Vaksinimi i më shumë se 80 për qind të personave mbi 12-vjeç ka mundësuar që Danimarka të heq gjitha kufizimet për përhapjen e koronavirusit. Masat ishin në fuqi për plot 548 ditë. Në këtë mënyrë Danimarka bëhet ndër vendet e para në Bashkimin Evropian që heq të gjitha masat e kufizimit të vendosura për shkak të pandemisë së Covid 19. Në klubet e natës, nga 10 shtatori nuk kërkohet më dëshmia e vaksinimit. Kjo ishte ndër masat e fundit që ishte në fuqi në këtë vend. Që nga 1 shtatori certifikata digjitale e vaksinimit nuk kërkohej më në asnjë vend, përveç klubeve të natës. Që nga mesi i muajit gusht, mbajtja e maskës në transportit publik nuk është më e detyrueshme. Megjithatë, autoritetet kanë vendosur që mbajtja e maskës të mbetet e detyrueshme në aeroportet e Danimarkës dhe njerëzit janë këshilluar që ta mbajnë atë kur shkojnë për vizitë te mjeku, në qëndrat e testimit apo spitale. Në kufijtë e këtij vendi ende zbatohen rregulla të rrepta për shtetasit jo-danezë që synojnë të hyjnë në territorin e tij për arsye të ndryshme.