Vendosja e gjobave për mosmbatjen e maskave apo për shkeljen e rregullave anticovid, nuk i ka frenuar qytetarët që të vijojnë të dalin sërish në rrugë pa maskë. Këtë e konfirmon edhe numri i lartë i gjobave të vendosura gjatë fundjavës nga patrullat e policisë, ku gjatë kontrolleve të ushtruara që kanë qenë më të shumta kanë evidentuar dhe ndëshkuar me masë administrative, 2953 shtetas që nuk kanë zbatuar masat anticovid, 2923 prej tyre për mosvendosjen e maskës mbrojtëse dhe janë ndëshkuar me masë administrative 3.000 lekë. nga këta 2490 shtetas janë konstatuar pa maskat mbrojtëse në rrugë ndërsa 433 janë konstuar nga Policia Rrugore që udhëtonin në mjete private me persona me të cilët nuk kishin lidhje familjare apo në mjetet e transportit publik, pa vendosur maskat mbrojtëse të cilët gjithashtu janë ndëshkuar me masë adminsitrative. Ndëshkime janë dhënë edhe për 3 subjekte të ndryshme që ushtronin aktivitetin në kundërshtim me protokollet e sigurisë, dhe ndaj administratorëve të tyre është vendosur gjobë në vlerë 1.000.000 lekë. në të gjithë vendin janë ndëshkuar me masë administrative 10.000 lekë, 27 shtetas që janë konstatuar duke lëvizur në këmbë pas orës 20:00. Në zbatim të masave anticovid, Policia e Shtetit apelon për të gjithë qytetarët dhe drejtuesit e mjeteve që të respektojnë orën policore, të vendosin maskën dhe të ruajnë distancimin social, ndërsa subjektet tregtare, lokalet dhe restorantet të respektojnë protokollet e sigurisë dhe orarin e mbylljes.