Arjan Sala është kthyer sot në heroin e ditëve tona, me veprimin e tij të jashtzakonshëm që i kushtoi jetën, teksa shpëtoi ato të kolegëve. Shefi 32 vjecar i sigurisë në qendrën tregtare Casa Italia hyri në magazinën ku ra zjarri duke shpëtuar 20 vetë, por vetë mbeti i bllokuar në katin përdhes të saj të kthyer në një ferr flakësh. Pamjet e para nga kamerat e sigurisë tregojnë momentin kur Sala nxiton me vrap të hyjë mes flakëve. Trupi i të riut u gjet përmbys, i mbuluar nga raftet dhe konfeksionet e magazinuara, e më pas i kanë rënë copat e suvasë dhe të betonit. Ai është asfiksuar, e rezultoi të kishte dëmtime në pjesën e gjymtyrëve të poshtme. Tre ditë zgjati zjarri në qendrën tregtare; 24 orë kishte rezistuar 32 vjecari mes tymit e flakëve. Zjarrfikësit pretendonin se kishin kontrolluar pjesën më të madhe të objektit por nuk po e gjenin, në një kohën kur famuiljarët insistonin të shqetësuar se ai kishte mbetur brenda dhe kërkonin ndërhyrjen e shtetit. Ekspertiza paraprake zbuloi se zjarri ka nisur për shkak të një shkëndije elektrike në kabllin e një llampe neoni.. Në fillim kanë qenë punonjësit e sigurisë, mes tyre edhe Sala, që kanë hyrë për të shuar flakët. Ata ia dolën të shuanin flakët fillimisht por jo vatrën dhe për pasojë, zjarri u riaktivizua disa minuta më pas. Arjani ishte personi që hyri në brendësi të magazinës për të shuar flakët dhe tentoi të dilte nga dera e emergjencës, por errësira dhe tymi e penguan dhe ai është rrëzuar.