Është zbardhur vrasja e Indrit Ndojit në Fushë-Krujë, i cili gjeti vdekjen pas një sherri për motive banale me dy vëllezër. Bëhet fjalë për shtetasit Sajmir Miri dhe Landi Miri, të cilët kanë qëlluar me kaçavidë viktimën, pas një sherri të çastit, duke i shkaktuar atij një gjakderdhje që e çoi në vdekje. Policia ka arrestuar dy vëllezërit të moshës 38 dhe 18 vjeç, pasi ka arritur të mbledhë provat e nevojshme në vendin e ngjarjes, por edhe në shtëpinë e tyre, që i implikon në këtë krim. Sipas njoftimit të policisë, 34-vjeçari ka qenë në masën “arrest shtëpie”, kur ka dalë në rrugë dhe është konfliktuar me dy vëllezërit. Të premten, Indrit Ndoj u gjet i pajetë në kanal pranë shtëpisë së prindërve në lagjen “Bakushe Visha”, ndërsa vetë viktima jetonte në një banesë në Hasan. Ai ishte emër I njohur për drejtësinë, pasi në vitin 2021 u kap me 19 emigrantë të paligjshëm, të cilëve iu kishte premtuar transport drejt Kosovës kundrejt një shume monetare. Materialet proceduriale i kaluan Prokurorisë pranë Gjykatës së Rrethit Gjyqësor Krujë, për veprime të mëtejshme, për veprën penale "Vrasja", e kryer në bashkëpunim.