Gjykata e Posaçme ka pranuar kërkesën e ish-deputetit socialist Jurgis Çyrbja për gjykim të shkurtuar, pas arrestimit të tij më 20 tetor të vitit të kaluar me akuzat për korrupsion aktiv në zgjedhje, përkrahje krimi dhe nxjerrje të sekretit hetimor. Nëse akuzat provohen, Çyrbja do të përfitojë ulje me një të tretën e dënimit. Seanca e radhës është caktuar më 20 tetor, në orën 13:00, ku Prokuroria e Posaçme do të japë konkluzionet përfundimtare. Sipas dosjes së SPAK, e kaluar për gjykim më 15 shtator, ish-deputeti ka pasur lidhje me Altin Hajrin, duke i premtuar mbështetje në këmbim të votave. Çyrbja dhe Ahmet Masha, janë arrestuar, ndërsa Altin Hajri vijon të jetë në kërkim për rrëmbimin dhe zhdukjen e Jan Prengës në vitin 2020. Çyrbja akuzohet për tre vepra penale, korrupsion aktiv në zgjedhje, përkrahja e autorit të krimit dhe tregtimi i sekretit shtetëror. Ai ka shërbyer si deputet për dy legjislatura dhe dha dorëheqjen në tetor 2024, pak para përfundimit të hetimeve të SPAK.