Eshtë e paimagjinueshme që edhe një festë, si Dita e Verës të kthehet në arenë politike, e sidomos tani, kur militantët mund të thuhet pa frikë se nuk kanë më peshën e ca viteve më parë, kur edhe të vrisnin, apo vrisje në rast se cënohej me fjalë lideri i partitë në të cilën bëje pjesë. E pamundur të mendosh, që edhe në vitin 2021, militantët bëhen protagonistë të incidenteve në emër të liderëve, kur vetë këta të fundit kanë bërë dhe nuk është cudi të kenë bërë marrëveshje edhe për këto zgjedhjet e fundprillit për në Kuvendin e Shqipërisë. Ajo që ndodhi këtë të dielë në Elbasan, as më shumë e as më pak është një sjellje e shëmtuar e ndikuar nga politika, ose liderët lokalë të partive politike. Por, kjo nxjerr në skenë një tjetër gjë dhe ka të bëjë me ccunat problematikë të Elbasanit, që janë përfolur prej kohësh që kanë lidhjet e tyre me krimin e organizuar. Nuk janë të pakta krimet që kanë ndodhur në këtë qytet në harkun e tre dekadave të fundit. Personazhe të botës së krimit veprojnë në qytet në shumicën e rasteve edhe me mbrojtje të politikës. E gjithë kjo të krijon përshtypjen se Elbasani do të përfshihet nga situata aspak të këndshme në 25 prill, aty ku politika përplaset për vendet në parlament. Jo vetëm në qytet, një trend i rrezikshëm që po vërehet në këtë qytet është se format organizative të grupeve kriminale po imitohen nga grupe të rinjsh në zonat rurale përreth. Duke pasur parasysh situatën ekonomike dhe edukimin në rrethina, rrezikohet zhvendosje e organizatave kriminale me struktura hierarkike në zonat rurale. Të pyetur për persona të skeduar dhe me rrezikshmëri në Elbasan, Policia nuk e pohoi, por as e mohoi një fakt të tillë. Një burim tha për Top Neës se ka një listë personash që po mbahet nën vëzhgim të rreptë, por nga ana tjetër konfirmuan se ka informacione për trazira në 25 prill, por sipas tyre, ato janë lehtësisht të eliminueshme, nëse vetë politika nuk bashkëpunon me ta.