Pas shifrave të zymta të kësaj periudhe, nga Maqedonia mbërrin një lajm i mirë: vendi regjistroi sot 268 persona të shëruar nga COVID-19, shifra më e lartë kjo e konfirmuar në një ditë që nga shpallja e pandemisë në mes të muajit marsit. Numri më i madh i të shëruarve u regjistrua në Shkup, që ështe dhe zona me më shumë infektime në shtetin fqinj. Pas kryeqytetit, numrin më të madh të të prekurve e kanë Tetova, Gostivari, Kumanova dhe Struga. Në 24 orët e fundit në Maqedoninë e Veriut po ashtu u krye një numër rekord testesh, gjithsej 1,971, të cilat rezultuan me 188 raste të reja pozitive me koronavirus. Sipas raportit të Ministrisë së Shëndetësisë, në 24 orët e fundit u regjistruan edhe pesë viktima nga koronavirusi: dy nga Tetova dhe nga një në Shkup, Manastir dhe Kumanovë. Numri i përgjithshëm i vdekjeve nga koronavirusi kështu në 476 , gati 200 prej të cilave janë në Shkup. Sakaq, Maqedonia e Veriut ka vendosur t`I mbajë mbyllur kufijtë edhe gjatë muajit gusht, por vetëm për Shqipërinë do të ketë lëvizje të lirë pa kushtëzim.