Rezerva valutore e Shqipërisë ka arritur një rekord të ri historik, duke kaluar 8.4 miliardë euro në fund të muajit gusht. Rritja lidhet kryesisht me blerjet e valutës nga Banka e Shqipërisë në tregun e brendshëm, në përpjekje për të frenuar forcimin e Lekut ndaj Euros. Megjithatë, monedha europiane ka vijuar të dobësohet, duke zbritur në shtator pranë nivelit rekord prej 91.4 lekësh. Rezerva valutore shërben si një mbrojtje ndaj goditjeve të mundshme ekonomike dhe ndihmon në garantimin e stabilitetit financiar të vendit. Ajo përbëhet kryesisht nga investime në tituj borxhi, depozita, ar dhe instrumente të tjera financiare. Megjithatë, Fondi Monetar Ndërkombëtar i ka rekomanduar Bankës së Shqipërisë të tregojë kujdes me rritjen e mëtejshme të rezervës, duke vlerësuar kostot dhe rreziqet që shoqërojnë këtë proces. Forcimi i Lekut ka sjellë humbje të konsiderueshme në bilancin e Bankës së Shqipërisë, pasi ndryshimi i kursit të këmbimit ul vlerën në lekë të rezervave të mbajtura në valutë të huaj. Ndërkohë, për vitin 2025, humbjet neto nga ndryshimet e kurseve të këmbimit arritën vlerën e 24.1 miliardë lekëve.