Vladimir Putin tronditi aleancën e NATO-s në Krishtlindje duke dërguar bombardues strategjikë bërthamorë Tu-95MS në një fluturim kërcënues me rreze të gjatë mbi Detin Norvegjez. NATO u detyrua të ngrinte avionë luftarakë për të ndjekur "Arinjtë" rusë ndërsa ata lëviznin pranë skajeve veriore të Mbretërisë së Bashkuar mes tensioneve në rritje për shkak të luftës në Ukrainë. Moska u krekos me misionin, duke thënë: "Bombarduesit me rreze të gjatë Tu-95MS të Forcave Hapësinore Ruse bënë një fluturim të planifikuar në hapësirën ajrore mbi ujërat neutrale të Detit Barents dhe Detit Norvegjez.Kohëzgjatja e fluturimit ishte më shumë se shtatë orë." Bombarduesit u shoqëruan nga avionë luftarakë Su-33 nga Marina Ruse. Rusia gjithashtu pranoi se NATO-ja po i ndiqte avionët e saj, duke shtuar: "Në faza të caktuara të rrugës, bombarduesit me rreze të gjatë veprimi u shoqëruan nga avionë luftarakë të vendeve të huaja", pa përmendur se cilat forca ajrore aleate u ngritën për t’i ndjekur. Fluturimi stërvitor dukej si një veprim i llogaritur i Kremlinit për të provokuar Perëndimin në Krishtlindje. Vetë Rusia i feston Krishtlindjet më 7 janar sipas kalendarit ortodoks. Deti Norvegjez shtrihet në verilindje të Skocisë, mes Norvegjisë dhe Islandës, afër hapësirës ajrore britanike. "Arinjtë", sic njihen ndryshe bombarduesit rusë Tu-95MS, janë futur në përdorim për herë të parë në vitet 1950 dhe mbeten një shtyllë qendrore e triadës bërthamore të Putinit. Me zhurmë shurdhuese, Tupolev-ët janë të vetmit bombardues strategjikë me helikë në botë. Përtej kërcënimit bërthamor, këta avionë janë përdorur edhe për të kryer sulme shkatërruese me raketa në Ukrainë, duke lënë pas vdekje dhe shkatërrim.