Udhëheqësit e Izraelit kanë sinjalizuar se po vlerësojnë opsionet e tyre se si t'i përgjigjen sulmit të Iranit të dielën herët në mëngjes, kur Teherani shënjestroi armikun e tij të betuar me më shumë se 300 raketa dhe drone. Sulmi i Iranit, i cili pasoi një sulm izraelit javën e kaluar mbi konsullatën iraniane në Damask të Sirisë, që vrau 13 persona, ishte i paprecedenttë: Ishte hera e parë që Teherani kishte vënë në shënjestër drejtpërsëdrejti tokën izraelite, pavarësisht dekadave të tëra armiqësi. Por nëse Izraeli do të kundërpërgjigjet ushtarakisht brenda Iranit, kjo nuk do të ishte hera e parë. Në fakt, për vite me radhë, Izraeli është fokusuar në një objektiv në veçanti brenda Iranit: programin bërthamor të vendit. Izraeli ka akuzuar prej kohësh Iranin për ndërtimin klandestine të një bombe bërthamore që mund të kërcënojë ekzistencën e tij, dhe publikisht, ka folur edhe për përpjekjet e tij diplomatike dhe ato të inteligjencës për të penguar këtë program. Irani mohon se ka pasur një program bërthamor ushtarak, ndërsa argumenton se ka të drejtë të punojë për akses në energji bërthamore për përdorim civil. E ndërsa Izraeli përgatit përgjigjen, le të ndalemi te sulmet e tij në iran, nga sulmet me dronë e ato kibernetike, e deri te vrasjet e shkencëtarëve dhe vjedhja e sekreteve.