Sekretari amerikan i Shtetit Anthony Blinken dhe ministri i Jashtëm ukrainas Dmytro Kuleba kanë zhvilluar një bisedë telefonike, ku temë ka qenë pikërisht ecuria e kundërofensivës së Ukrainës ndaj Rusisë. “Ishte një telefonatë ku u fol për ecurinë e kundërofensivës së Ukrainës, përpjekjet për një paqe të drejtë dhe të qëndrueshme në Jeddah dhe marrëveshjet afatgjata mbi sigurinë, mes dy vendeve”, tha Departamenti i Shtetit në një deklaratë mbi telefonatën. Blinken ripohoi gjithashtu mbështetjen e palëkundur dhe të vazhdueshme të Shteteve të Bashkuara për mbrojtjen e Ukrainës kundër agresionit rus dhe mbështetjen e vazhdueshme për një ushtri të fortë ukrainase dhe institucione të përgjegjshme të mbrojtjes. Nga ana tjetër, Kuleba reagoi në Twitter për bisedën, ku tha se ka theksuar nevojën për forcimin e aftësive luftarake të Ukrainës.