Presidenti i Shteteve të Bashkuara, Joe Biden, është pajtuar në parim për një samit me presidentin rus, Vladimir Putin, gjatë ditëve të ardhshme, ndërsa lideri amerikan po kërkon që ta pengojë udhëheqësin e Kremlinit që ta pushtojë Ukrainën. Biden do të takohej me Putinin pas bisedimeve të 24 shkurtit midis sekretarit amerikan të Shtetit, Antony Blinken dhe ministrit të Jashtëm rus, Sergei Lavrov, “nëse nuk ka ndodhur një pushtim”, tha zëdhënësja e Shtëpisë së Bardhë, Jen Psaki përmes një deklarate. Ideja e një takimi dypalësh është propozuar nga presidenti francez, Emmanuel Macron, i cili ka zhvilluar bisedime të ndara me dy liderët më 20 shkurt. Nuk është bërë e ditur se në cilën datë apo në cilin vend do të mbahej ky samit. Biden dhe Putin u takuan për herë të parë në Gjenevë në muajin qershor. Ai samit u nxit pas një grumbullimi më të vogël të ushtrisë ruse pranë Ukrainës, që ndodhi gjatë pranverës. Ministri i Jashtëm ukrainas, Dmytro Kuleba tha më 21 shkurt se mirëpret nismën e Macronit dhe shpreson që kjo do të çojë në tërheqjen e trupave ruse që po kërcënojnë shtetin e tij. “Ne mirëpresim këtë nismë. Ne besojmë se çdo përpjekje që ka për qëllim zgjidhjen diplomatike, ja vlen të provohet”, tha Kuleba. “Ne shpresojmë që dy presidentët do të dalim nga takimi me një marrëveshje që Rusia të tërheqë trupat e saja nga Ukraina”.