Telenovela e vulës dhe siglës së Partisë Demokratike do të vijojë sërish nëpër gjykata. Gjykata e Apelit të Tiranës pas një seance maratonë doli me vendimin e prishjes së vendimit të gjyqtarit Agron Zhukri dhe rikthim të çështjes sërish në gjykatën e shkallës së parë me një tjetër gjyqtar. Vendimi do të thotë se Sali Berisha nuk mund të regjistrohet në zgjedhjet e 14 majit me siglën dhe vulën e Partisë Demokratike, pasi afati i fundit për të bërë këtë regjistrim është dita e hënë e javës së ardhshme. Me kaq pak kohë në dispozicion, Berisha duhet të mendojë formulën për të regjistruar kandidatët e shpallur përmes procesit të primareve. Njëra prej tyre mund të jetë ajo që u zbatua më 6 mars të vitit të kaluar në zgjedhjet e pjesshme në 6 bashki. Në ato zgjedhje, Berisha hyri si koalicion, ku partia udhëheqëse ishte Lëvizja Socialiste për Integrim në atë kohë, sot Partia e Lirisë. Përveç pasojës juridike, ky vendim i gjykatës mund të risjellë përplasjet fizike mes demokratëve. Vendimi i Zhukrit e mbante deri më tani Sali Berishën në godinën e Partisë Demokratike. Me rënien e këtij vendimi, grupimi i Alibeajt mund të kërkojë rimarrjen e saj.