Ish-kryeministri Sali Berisha, e konsideron raportin për Shqipërinë, të miratuar nga Komisioni i Jashtëm i Parlamentit Europian, si një damkosje për Shqipërinë dhe qeverinë Rama. Në një prononcim nga Brukseli, Berisha tha se raporti e nxjerr Ramën, si një regjim që nuk njeh ligj. Në raport damkoset regjimi i Edi Ramës si një regjim në të cilin ndërhyhet politikisht fuqishëm në sistemin e drejtësisë. U shpreh shqetësimi i madh për stokun e madh të dosjeve, çka nënkupton mungesë procesi ligjor të drejtë për qytetarët shqiptarë. Ky raport denoncoi me qartësinë më të madhe farsën elektorale të 11 Majit 2025 pasi e vërteta është se raporti citon hyrjen e raportit të përbashkët të OSBE/ODIHR, Parlamentit Europian, Këshillit të Europës dhe Asamblesë Parlamentare të OSBE, në të cilin që në rreshtat e para thuhet se qeveria përdori burime të gjera për të dominuar në zgjedhje. Ish-kryeministri poashtu bëri të ditur se ka vënë në dijeni Brukselin për ndërhyrje të kryeministrit për ndryshim të raportit të vëzhguesve nëpërmjet presionit, për çka tha se PD nuk do të ndalet duke paralajmëruar edhe protesta.