Seanca gjyqësore e parashikuar për këtë të mërkurë në GJKKO ndaj ish-ministrit të Shëndetësisë, Ilir Beqaj, në kuadër të hetimeve për dosjen dosjen e abuzimit me fondet e BE është shtyrë. Beqaj nuk ishte i pranishëm në sallën e gjyqit, por u përfaqësua nga avokati i tij mbrojtës, Ermal Yzeiraj. Që prej datës 10 korrik, Ilir Beqaj ndodhet i shtruar në spital. Fillimisht ai mori ndihmën e parë në spitalin e Durrësit dhe më pas u rikthye në qeli, por përkeqësimi i gjendjes shëndetësore bëri që mjekët të vendosin transferimin e tij në Qendrën Spitalore Universitare “Nënë Tereza” në Tiranë. Sipas burimeve Beqaj po përballet me një infeksion serioz. Infeksioni fillimisht ishte i përqendruar në lëkurë dhe filloi të përhapej në trup. Edhe pse pjesa sipërfaqësore tashmë është përmirësuar, ai vazhdon të ketë komplikacione të brendshme, për të cilat po merr trajtim të specializuar në QSUT.