Bashkimi Evropian konfirmoi vendosjen e kontrolleve për eksport të vaksinave për koronavirus, të cilat janë prodhuar brenda territorit të BE-së, ndërkohë që rriten pakënaqësitë për zvogëlim të furnizimeve.“Mbrojtja dhe siguria e qytetarëve tanë janë prioritete dhe sfidat me të cilat përballemi nuk na kanë lënë zgjidhje tjetër”, ka thënë Komisioni Evropian. BE-ja i ka bërë të ditura publikisht mospajtimet që ka me kompaninë AstraZeneca. Kjo erdhi pas blloku është duke u përballur me presion në rritje për shkak të mungesës së vaksinave. KE bëri më herët publike edhe kontratën që ka nënshkruar me kompaninë AstraZeneca, duke thënë se kjo e fundit ka dështuar në mbajtjen e premtimeve. Nënkryetari i Komisionit Evropian, Valdis Dombrovskis, tha se siguria dhe shëndeti i qytetarëve të BE-së, është prioritet i Komisionit Evropian. Ai sqaroi se masat përmes së cilave do të mund të mos lejohet eksporti i vaksinave të prodhuara në BE do të jenë të përkohshme dhe do të zgjasin deri në fund të muajt mars. Sipas këtyre masave, prodhuesit do të duhet të sigurojnë leje për eksport nga shtetet ku prodhohen vaksinat. Një leje e tillë mund të mos jepet nëse vlerësohet se ajo kompani nuk i ka kryer detyrimet nga kontratat me BE-në për furnizimin me dozat sipas kontratave. Por, nënkryetari i Komisionit Europian ka sqaruar se këto masa nuk do të vlejnë për eksport në vendet e Ballkanit Perëndimor, ato të fqinjësisë lindore si dhe në vendet e varfra dhe vendet më pak të zhvilluara, të cilat do të sigurojnë vaksinat përmes nismës COVAX. Sipas tij, nga këto masa do të përjashtohen rreth 92 shtete.