Bullgaria lëshoi alarmin e kuq për shkak të valës së të nxehtit, ndërsa Maqedonia e Veriut kërkoi ndihmë ndërkombëtare. Zjarret po përhapen në Ballkan ndërsa temperaturat vazhdojnë të rriten në një kohë kur pjesa juglindore e Evropës përjeton një nga valët më të fuqishme të të nxehtit, këtë vit. Kryeministri i Bullgarisë Dimitar Glavçev u bëri thirrje qytetarëve të jenë "shumë të kujdesshëm" dhe vendi shpalli kodin e kuq për valën e të nxehtit. Zjarret kanë përfshirë zona të mëdha në jug dhe jugperëndim të vendit. Kryeministri vizitoi një shtëpi tyë djegur në rajonin Stara Zagora, duke folur me banorët vendas dhe vullnetarët që ndihmuan për të shuar flakët. “Situata për momentin është nën kontroll. Shteti është i gatshëm të ofrojë mbështetje shtesë nëse është e nevojshme përmes Komisionit Ndërinstitucional për Rimëkëmbje dhe Ndihmë”, tha Glavçev, duke theksuar se Bullgaria ka garanci për mbështetje nga Çekia dhe Rumania. Ka gjithashtu dhjetëra zjarre aktive në Maqedoninë e Veriut. Më i madhi prej tyre në malin Serta, në rajonin e Negotinës. Rreth 700-800 hektarë pyll me pisha janë djegur dhe zjarri ende nuk është vendosur nën kontroll. Qeveria e Maqedonisë së Veriut i kërkoi BE-së që ta ndihmojë duke aktivizuar mekanizmin e mbrojtjes civile të bllokut. Avionë zjarrfikës mbërritën menjëherë nga Turqia, Mali i Zi, Serbia dhe Sllovenia dhe u vendosën në zonat e zjarrit.