Miratimi i propozimit francez në Kuvendin Maqedonas, hapi dritën jeshile për mbajtjen e konferencës së parë ndërqeveritare, duke shënuar edhe çeljen zyrtare të negociatave për Shqipërinë dhe Maqedoninë e Veriut. Këtë të hënë, drejt Brukselit do të udhëtojë kryeministri i vendit, Edi Rama së bashku me një delegacion shqiptar, të cilët do të ulen në një tryezë të përbashkët me përfaqësuesit e lartë të Bashkimit Europian. Referuar axhendës zyrtare, para mbajtjes së konferencës së parë ndërqeveritare, kryeministri Edi Rama, së bashku me homologun e tij maqedonas, Dimitar Kovaçevski, do të zhvillojnë një takim zyrtar me presidenten e komisionit europian, Ursula Von Der Leyen. Bisedimet janë planifikuar të zgjasin për 30 minuta, dhe në përfundim të takimit do të ketë edhe një deklaratë të përbashkët për shtyp.