Botohen në Fletoren Zyrtare të muajit shtator tarifat e shpërblimit për avokatët, pas udhëzimit të fundit të Ministrisë së Drejtësisë. Kësisoj kanë ndryshuar tarifat e shpërblimit të avokatëve që thirren nga gjykatat për rastet kur të pandehurit nuk kanë mundësi financiare për t’i paguar. Sipas vendimit të publikuar në dokumentin zyrtar të shtetit, Avokati mbrojtës që caktohet nga gjykata përzgjidhet nga lista e vënë në dispozicion e këshillit drejtues të Dhomës të Avokatëve, ndërsa shpenzimet për mbrojtjen bëhen nga shteti. Në fakt kanë qenë dy ministri që punuan udhëzimin e përbashkët. Ministrja e Drejtësisë Etilda Gjonaj dhe ajo e Financave Anila Denaj propozuan dhe në fund u miratuan kriteret e përfitimit të pagesave dhe tarifat e shpërblimit për avokatët që ofrojnë ndihmë juridike dytësore. Udhëzimi i ri përfshin për herë të parë tarifën për krimet që do të gjykohen në Gjykatën e Posaçme për Korrupsion dhe Krim të Organizuar. Avokatët mbrojtës të shtetit për këtë shërbim do të shpërblehen 96 mijë lekë.