Në ceremoninë e diplomimit të 26 prokurorëve të rinj prokurori i përgjithshëm Olsian Çela foli sërish për draftin e kodit të ri penal duke e kundërshtuar këtë nismë si të pa nevojshme dhe të pa konsultuar si duhet “Pse ky kod është i pa mjaftueshëm për tu përgjigjur sfidave qe ka shoqëria rrugëtimi që kemi për integrimin në BE patjetër që mund të ketë nevojë për përmirësimin e këtij kodi apo për draft të ri. Ama më së pari duhet të kishim vendosur binarët ku do të ecte drafti dje do e bënte dhe më të lehtë debatin”, u shpreh kryeprokurori Olsian Çela. Sipas prokurorit të përgjithshëm në këtë moment ku është sistemi i drejtësisë në Shqipëri ku kryefjalë është mbingarkesa e prokurorëve një kod i ri penal mund të përkeqësonte situatën. “Në momentin që po kalon sistemin i drejtësisë aplikimi i një kodi të ri penal do të thotë rivlerësim të secilës çështje në hetim apo gjykim në prizmin e kodit të ri. Drafti është kompleks dhe vetëm njohja do kërkonte mjaft kohë”, tha kryeprokurori. Sipas Çelës ky draft krijon konfuzion në zbatim dhe rrit mundësinë për interpretime të ndryshme në raste të ngjashme si dhe një rrezik të shtuar të kriminalizimit të individëve, si pasojë e zgjerimit të veprimeve që cilësohen si të rrezikshme dhe që parashikohen me dënime burgimi.