Të enjten në mbrëmje, një autobus u përplas me një tren të ndaluar në zonën e imbarkimit të automjeteve për në Tunelin e Kanalit të La Manshit, në Francë. Si pasojë, mbetën të lënduar shoferi dhe 18 pasagjerë, bënë të ditur autoritetet. Pesë persona pësuan lëndime të rënda, por jeta e asnjërit prej tyre nuk duket të jetë në rrezik, deklaruan zyrtarët. Minibusi po transportonte shoferë kamionësh të kombësive të ndryshme, të cilët po përgatiteshin të udhëtonin me një tren "LeShuttle", shërbim që transporton automjete dhe pasagjerët e tyre përmes tunelit. Zona përreth hyrjes së tunelit u bllokua të enjten në mbrëmje, raportuan korrespondentët e AFP-së nga vendngjarja, ku ishin të pranishëm një helikopter dhe disa automjete të shërbimeve të urgjencës. Prokuroria lokale njoftoi se është hapur një hetim mbi dyshimin për shkaktim të lëndimeve pa dashje. Zyrtarët thanë se trafiku i mallrave nuk u ndërpre, ndërsa shërbimet e trenave të pasagjerëve të "Getlink" u pezulluan për një orë, kohë gjatë së cilës ekipet e urgjencës u kujdesën për të lënduarit. Më pas qarkullimi u kthye në normalitet. Kompania hekurudhore e pasagjerëve "Eurostar" bëri të ditur se shërbimet e saj nuk janë prekur nga ngjarja. Me një gjatësi prej 50 kilometrash, Tuneli i Kanalit të La Manshit është infrastruktura më e gjatë e këtij lloji në botë. Ai lidh Francën veriore me Folkestone-in në Angli, që nga viti 1994. Tuneli menaxhohet nga kompania "Getlink" dhe përdoret çdo ditë nga qindra trena.