Dy shtetas anglezë kanë përfunduar në prangat e policisë së Vlorës nën akuzën shpërndarjes së drogërave të forta në zonën e Dhërmiut. Anglezët e arrestuar janë të moshës 33 dhe 34 vjeç. Ata u ndaluan në fshatin e Dhërmit, pasi gjatë kontrollit që policia kreu në dhomën ku qëndronin dhe në automjetin e marrë me qira u gjetën 52 doza drogë e llojit MDMA, ketaminë, 120 kokrra ekstazi dhe gati 10 mijë euro në valutë. Nga veprimet hetimore dyshohet se këta shtetas i shisnin dozat e lëndëve narkotike në ambientet e lokaleve përgjatë vijës bregdetare, të frekuentuara nga pushues dhe turistë vendas dhe të huaj. Operacioni që çoi në arrestimin e dy anglezëve u ndërmor pas informacioneve operative që policia e shtetit kishte siguruar për aktivitetin e paligjshëm të tyre. Burimet pohojnë se anglezët kanë pak kohë që kanë hyrë në Shqipëri duke u maskuar si turistë.