Zinxhiri fleksibël i komandës së Hezbollahut, bashkë me rrjetin e tij të gjerë të tuneleve dhe një arsenal të madh raketash dhe armësh që është përforcuar gjatë vitit të kaluar, po e ndihmon atë të përballojë sulmet e paprecedenta të Izraelit, thanë tre burime të njohura me operacionet e grupit militant libanez. Sulmet e fundit të Izraelit ndaj Hezbollahut kanë bërë që grupi i fuqishëm të tronditet. Të premten, Izraeli vrau komandantin që themeloi dhe drejtoi forcën elitare Radëan të grupit, Ibrahim Aqil. Por, burimet e njohura me operacionet e Hezbollahut, thonë për Reuters se grupi caktoi me shpejtësi një zëvendësues për komandantin e vrarë. Një burim i katërt, zyrtar i Hezbollahut, tha se sulmi ndaj pajisjeve të komunikimit nxorri 1,500 luftëtarë jashtë funksionit për shkak të plagëve të pësuara, ku shumë prej tyre ishin verbuar ose kishin humbur duart. Ndonëse një goditje e rëndë, ajo përfaqëson vetëm një pjesë të fuqisë së Hezbollahut, të cilën një raport për Kongresin amerikan e vendosi në 40 deri në 50 mijë luftëtarë. Lideri i Hezbollahut, ka thënë ndërkohë se grupi ka 100,000 luftëtarë. Që nga tetori, Hezbollahu ka mbledhur luftëtarë nga zona të tjera të vendit, thanë tre burimet. Ai gjithashtu ka sjellë raketa në Liban me një ritëm të shpejtë, duke parashikuar një konflikt të zgjatur. Mbështetësi kryesor dhe furnizuesi i armëve i Hezbollahut është Irani. Grupi është fraksioni më i fuqishëm në "Boshtin e Rezistencës" të Teheranit në të gjithë Lindjen e Mesme. Shumë prej armëve të tij janë modele iraniane, ruse ose kineze. Hezbollahu besohet se ka një arsenal nëntokësor dhe muajin e kaluar publikoi pamje që tregonin luftëtarët e tij duke drejtuar kamionë me raketahedhës nëpër tunele. Arsenali i Hezbollahut besohet se përfshin rreth 150,000 raketa, thuhet në raportin e Kongresit amerikan. Dhe raketat më të fuqishme balistike me rreze të gjatë veprimi duket se mbahen nën tokë. Hezbollahu ka shpenzuar vite duke ndërtuar një rrjet tunelesh që sipas vlerësimeve izraelite shtrihet në qindra kilometra. Arsenali dhe tunelet e grupit janë zgjeruar shumë që nga lufta e vitit 2006. Disa ekspertë theksojnë se ndryshe nga gaza, ku tunelet janë gërmuar me dorë në tokë ranore, në liban tunelet janë gërmuar thellë, në shkëmbinj malorë. Ndaj janë edhe më pak të arritshëm se tunelet e gazës dhe më të vështirë për tu shkatërruar se ata. Jo më kotë, disa analistë nënvizojnë se Hezbollahu është armiku më i frikshëm me të cilin izraeli është përballur ndonjëherë.