Pjesa e parë e paketës së ndihmës ushtarake të shteteve të bashkuara për Ukrainën, prej 200 milionë dollarësh, ka mbërritur tashmë në Kiev – tha ambasada amerikane të shtunën. Paketa pason vizitën e sekretarit amerikan të shtetit në Kiev këtë javë, në mesin e shqetësimeve nga Ukraina dhe aleatët perëndimor për dhjetëra e mijëra trupat ruse të mbledhura në kufijtë e vendit. Rusia mohon të jetë duke planifikuar një ofensivë ushtarake. Uashingtoni e miratoi paketën 200 milionë dollarëshe në dhjetor. “SHBA do të vazhdojë të sigurojë ndihma për forcat e armatosura të Ukrainës në përpjekjen e tyre për të mbrojtur sovranitetin e vendit dhe integritetin territorial të tij kundër një agresioni rus”, tha ambasada në faqen e saj në Facebook. Ministri i mbrojtjes i Ukrainës, falenderoi ndërkohë SHBA për ndihmën. Vetëm gjatë vitit të shkuar, SHBA i ka dhënë ukrainës më shumë se 400 milionë dollarë për sigurinë. Që nga 2014, SHBA e ka furnizuar vendin me raketat anti tank Javelin, armë të vogla dhe muncione, anije patrullimi etj.