Pas rrëzimit nga Komisioni i Ankimime dhe Sanksioneve, të kërkesës së doktor Ilir Alimehmeti, kandidat për deputet i Partisë Demokratike në zgjedhjet e 11 majit për Qarkun Tiranë, ky i fundit vijon betejën në Kolegjin Zgjedhor. Ky i fundit ka hedhur shortin për trupën që do të gjykojë kërkesën e Alimehmetit, ku edhe janë bërë të ditur emrat e atyre që do kenë në dorë shqyrtimin e saj. Kësisoj sipas shortit të hedhur trupa në fjalë është e përbërë nga 1. Entela Shedula (Relatore);, 2. Artan Çupi (Anëtar);, 3. Rexhep Bekteshi (Anëtar);, 4. Ornela Naqellari (Anëtare); dhe 5. Enkel Peza (Anëtar). Kujtojmë se Alimehmeti çoi në KAS ankimim kundër miratimit të Tabelave të Rezultateve për Tiranën, teksa kërkoi zhbërjen e tyre dhe rinumërim të votave preferenciale. Pavarësisht kërkesës, KAS vendosi ta rrëzojë atë, teksa tashmë kjo kërkesë do të përballet në Kolegjin Zgjedhor. Alimehmeti në kërkesën e tij drejtuar Kolegjit Zgjedhor parashtron edhe mundësinë që “Si alternativë ndaj mospranimit të kërkesave të mësipërme, dërgimin për kontroll incidental pranë Gjykatës Kushtetuese të nenit 124, paragrafi 1, i Kodit Zgjedhor të Republikës së Shqipërisë, duke u bazuar në nenin 145 të Kushtetutës së Republikës së Shqipërisë.”