Është rindezur debati midis dy krerëve të shtetit. Presidenti Ilir Meta dhe Kryeministri Edi Rama kanë shkëmbyer mesazhe të forta publike kundër njëri-tjetrit. Në prag të mbledhjes së Asamblesë së Partisë Socialiste, Presidenti IlirMeta duket se ka filluar një fushatë anti-Rama në publik, por edhe brenda partisë socialiste. Nëpërmjet një mesazhi publik, në rrjetet sociale, që I ka drejtuar asamblesë së Partisë Socliaste, Meta i ka bërë thirrje kryeministrit që të bëjë publik emrin e personit që është subjekt i Operacionit Forca e Ligjit, me të cilin Rama po e akuzon prej ditësh se takohet Presidenti. Meta shkruan se nëse Rama nxjerr emrin, orën dhe ‘skutën’ ku sipas kryeministrit Presidenti është takuar me subjektin e OFL-së, atëherë Kreu i Shtetit, do të japë dorëheqjen që sot. Por në të kundërt, Meta kërcënon se do të faktojë lidhjet e Ramës me botën e krimit ku në të njëjtën kohë i bën thirrje socialistëve për ta rrëzuar atë nga partia.