Lavazhet në të gjithë vendin do të përballen me kontrolle për përdorimin e ujit të pijshëm nga rrjeti publik për aktivitetin e tyre. Agjencia Kombëtare e Ujësjellës-Kanalizimeve njoftoi se ka nisur një aksion kombëtar, ndërsa subjektet kanë afat deri më 31 tetor për të ndërprerë këtë praktikë. Kodi i Furnizimit me Ujë ndalon përdorimin e ujit të pijshëm për aktivitetin e lavazheve. Për këtë arsye, subjektet duhet të sigurojnë një burim alternativ dhe të ligjshëm furnizimi. Drejtori i Përgjithshëm i AKUK, Fludian Çuka, paralajmëroi se pas 31 tetorit kontrollet do të intensifikohen dhe ndaj shkelësve do të merren masat administrative të parashikuara nga ligji. Ai paralajmëron gjithashtu se nuk do të ketë tolerim për lidhjet e paligjshme në rrjet. Sipas institucionit, ndërhyrjet e tilla do të dokumentohen dhe do t’u referohen organeve kompetente, pasi përbëjnë vepër penale.