Një aksident i rëndë është regjistruar në orët e vona të së hënës në rrethrrotullimin në dalje të qytetit të Beratit, në zonën e By Pass-it. Në aksident janë përfshirë tre 16-vjeçarë që po lëviznin me motorë elektrikë. Sipas informacioneve paraprake, të miturit dyshohet se po zhvillonin gara me njëri-tjetrin, kur kanë humbur kontrollin në rrethrrotullim dhe janë përplasur. Të tre të rinjtë janë transportuar me urgjencë në Spitalin Rajonal të Beratit. Dy prej tyre, të cilët kanë pësuar dëmtime të rënda në kokë, janë dërguar më pas në Spitalin e Traumës në Tiranë, në gjendje të rëndë shëndetësore. Ndërkohë, 16-vjeçari i tretë po merr trajtim në Spitalin e Beratit jashtë rrezikut për jetën, por me fraktura të shumta. Policia ngriti një grup hetimor për rastin në fjalë dhe po punohet për zbardhjen e plotë të dinamikës së ngjarjes së rëndë.