Një aksident i rëndë rrugor ka ndodhur mesditën e së mërkurës në zonën e Borizanës, përgjatë rrugës së vjetër Thumanë-Fushë-Krujë, ku si pasojë e përplasjes mes dy automjeteve tip “Mercedes” ka humbur jetën një grua dhe janë plagosur tre persona të tjerë. Sipas të dhënave njëra nga makinat drejtohej nga M. K, ndërsa mjeti tjetër drejtohej nga shtetasi me iniciale I. S, i cili udhëtonte bashkë me dy pasagjere, njëra prej të cilave nëna e tij 85 vjeçe me iniciale B. S. Përplasja ka rezultuar fatale për këtë të fundit, e cila ka humbur jetën në vendin e ngjarjes. Tre personat e tjerë të përfshirë janë dërguar me urgjencë në Spitalin e Traumës në Tiranë dhe ndodhen në gjendje të rëndë shëndetësore. Të katër të përfshirët në aksident janë banorë të zonës së Fushë-Krujës. Policia Rrugore dhe grupi hetimor ndodhen në vendngjarje dhe kanë nisur hetimet për të zbardhur shkaqet e aksidentit.