Rajoni verior dhe jugor janë përfshirë nga reshjet e dëborës. Autoritetet e policisë rrugore, kanë bërë thirrje drejtuesve të mjeteve që të mos neglizhojnë përdorimin e gomave të dëborës, apo zinxhirëve gjatë lëvizjes në akset problematike, pasi bllokimi i tyre në rrugë pengon punën e borëpastrueseve. Situata paraqitet problematike veçanërisht në Qarqet e Kukësit, Dibrës dhe Korçës. Sipas informacioneve nga strukturat përkatëse, reshjet e borës do të vazhdojnë me intensitet të lartë edhe gjatë natës dhe për këtë arsye ARRSH ka koordinuar punën me Policinë e Shtetit për të mos lejuar lëvizjen e mjeteve në akset problematike pa goma dimërore apo zinxhirë. Raportohet se në rajonin verior, në aksin Trebisht- Doganë (Xhepisht) ka reshje borë 30-35cm dhe qarkullohet me zinxhirë. Segmenti Urë Cereneci – Klenjë, ka reshje dëbore 30 – 35cm, shoqëruar me erë. Qarkullimi rekomandohet me zinxhirë në aksin Qafë Bualli – Krastë, ku trashesia e borës ka arritur ne 20 – 25 cm. Probleme si pasojë e reshjeve të borës raportohet edhe në qarkun e Kukësit, në aksin Kukës – Bushtricë, ku vijojnë reshjet e bores. Gjithashtu në qarkun e Shkodrës në aksin Qafë Mali – Fierzë ka pasur rreth 20 cm bore, ku borëpastruesja ka bërë të mundur qarkullimin normal të mjeteve. Në rajonin jugor, në qarkun Korçë ka reshje të dobëta dëbore. Trashësia varion nga 5cm-15 cm. Në rrugën e Dardhës nga km 8 deri ne km 14 rekomandohen kalimi i mjeteve me zinxhirë ose goma dimërore pasi ka reshje dëbore shoqëruar me erë të fortë. Sakaq mjetet borëpastruese dhe punonjësit e kompanive kontraktore të mirëmbajtjes janë në gatishmëri të plotë, duke bërë të mundur mbajtjen hapur të akseve rrugore.