Mbledhja e grupit parlamentar të Partisë Demokratike ka agravuar, ku përveç debateve mes deputetëve dhe kryedemokratit Lulzim Basha, të cilit i është kërkuar që të bëhet një hap pas për t’i hapur rrugë bashkimit të demokratëve, tensionet janë shtuar edhe më tej. Deputetja Orjola Pampuri e deklaruar në krah të Lulzim Bashës ka debatuar me tone të larta me deputetin Ervin Salianji, i cili kërkon dorëheqjen e kryedemokratit. Ky i fundit ka ndërhyrë për të ulur tonet mes deputetëve, duke u përfshirë në debat verbal me Salianjin. Ndërkohë debati nuk ka përfunduar me kaq, pasi në mbledhjen e grupit parlamentar ka hyrë edhe një mbështetëse e krydemokratit Lulzim Basha. Burime nga mbledhja bëjnë me dije se mbështetësja e Bashës është konfrontuar fizikisht me Salianjin teksa për qetësimin e situatës kanë ndërhyrë edhe deputetët e tjerë. Ervin Salianji është ndër të parët deputetë që ka kërkuar dorëheqjen e Lulzim Bashës pas humbjes në zgjedhjet e pjesshme lokale të 6 marsit.