Një agjenci qeveritare e Shteteve të Bashkuara e themeluar më 2008 për të vlerësuar përpjekjet amerikane për të mbështetur Afganistanin ka dorëzuar raportin e fundit në Kongres – në të cilin përmenden shpërdorime masive të fondeve dhe “korrupsion i përhapur masivisht” gjatë ndërhyrjes 20-vjeçare të Perëndimit. Raporti është përpiluar nga Inspektori i Përgjithshëm Special për rindërtim të Afganistanit, agjenci qeveritare dhe është publikuar më 30 korrik, dy javë para përvjetorit të katërt të rikthimit të talibanëve në pushtet në Afganistan. Në kapitullin e titulluar “Gjetjet kryesore në fund të misionit” theksohet se Qeveria afgane e përkrahur nga Perëndimi, me raste nuk i ka pëlqyer projektet që i kanë propozuar Shtetet e Bashkuara. Agjencia thotë se fondet amerikane janë vjedhur masivisht nga qeveritë afgane ndër vite dhe si shembull sjell shpërdorimin me vlerë 26 milionë dollarë për të ndërtuar pesë pika kufitare. Nga hetimi i agjencisë rezultoi se pikat e ndërtuara ishin me vlerë modeste, që nuk tejkalonte disa qindra mijëra dollarë, madje në një rast si pikë kufitare ishte vendosur një kafaz i ngjashëm me atë të pulave.