Situata e rënduar e pandemisë dhe respektimi i masave anticovid, nuk ka mbetur jashtë vëmendjes së konferencës së kryetarëve në Kuvend, ku është diskutuar dhe miratuar kalendari i punimeve për 3 javët në vazhdim. Deputetja e PS e njëkohësisht kryetare e komisionit për Politikën e Jashtme, Mimi Kodheli i ka kërkuar kryeparlamentarit Gramoz Ruçit t’i tërheqë vëmendjen, stafit të Kuvendit të cilët nuk mbajnë maskat mbrojtëse gjatë orarit të punës. kërkesa e kodhelit për Rucin është konfirmuar nga zbardhja e detajeve të takimit nga Top Channel. “Kam një kërkesë, një lutje, një vëzhgim lidhur me sjelljen e punonjësve të administratës së Kuvendit. Janë pothuajse të gjithë pa maska. Do t’ju lutesha Kryetar, pasi ne vazhdojmë të jemi në një situatë shumë të rënduar pandemie, që me personalitetin tuaj edhe më pozicionin tuaj të ngarkoni dikë që të mund të menaxhojë një gjë. Madje dalim keq ne që mbajmë nga dy maska dhe kërkojmë që të zbatohen rregullat”, është shprehur Kodhelin Top Channel. Shqetësimi i deputetes socialiste ka surprizuar Ruçin, i cili e cilësoi si të patolerueshme një sjellje të tillë të punonjësve të administratës. “Kush neglizhon duhet të marrë masa për zbatimin e masave. Ndaj ky shqetësim është shumë i drejtë. Është hera e parë që e dëgjoj këtë histori dhe është e papranueshme dhe e patolerueshme, ndaj nuk diskutohet që do të korrigjohet menjëherë”, u shpreh Ruçi në mbledhjen e Konferencës së Kryetarëve.