Policia e Shtetit ka zbuluar një ‘supervjedhje’ që i është bërë një biznesmeni në Tiranë, i cili kryente blerje online dhe përmes email-it, i kanë ndryshuar faturën duke i përvetësuar 89550 euro. Pas rreth një muaj hetimesh, Njësia për Hetimin e Krimit Kibernetik në Policinë e Shtetit zbardhi skemën e mashtrimit dhe identifikoi autorin. Sipas Policisë autori është një shtetas i huaj që nuk jeton në Shqipëri. Policia, në bashkëpunim me një bankë të nivelit të dytë në vendin tonë, bëri të mundur bllokimin e shumës 89550 euro, e cila ishte transferuar në një llogari jashtë Shqipërisë. Nga hetimet e deritanishme rezulton që ky shtetas i huaj ka hapur llogari bankare jashtë Shqipërisë, me të cilën përfitonte fonde nga vende të ndryshme të botës nëpërmjet skemave të mashtrimit kibernetik. Policia ka arritur të zbulojë skemën e mashtrimit pasi në qershor 2020 ka marrë kallëzim nga një biznesmen shqiptar pasi persona të paidentifikuar. Pas hetimeve u zbulua se nëpërmjet një skeme mashtruese, bazuar në teknologjinë e informacionit dhe komunikimit, kishin krijuar adresa të rreme elektronike, të ndërtuara me qëllimin për të mashtruar viktimat dhe për të devijuar transfertën e parave të biznesmenit shqiptar, duke i ndërhyrë në e-mail dhe duke i marrë të dhënat. Në këtë mënyrë ata arritën të marrin 89550 euro.