Gjatë 24 orëve të fundit janë raportuar 58 vatra zjarri në mbarë vendin, prej të cilave vetëm një vijon të jetë ende aktive. Sipas Qendrës Kombëtare Operacionale të Emergjencave Civile, situata është menaxhuar në mënyrë intensive nga strukturat përkatëse, duke bërë të mundur neutralizimin e pothuajse të gjitha vatrave në kohë të shpejtë. Në qarkun e Lezhës janë regjistruar 8 vatra, të gjitha të shuar me sukses, vetëm njërit në fshatin Markatomaj, njësi administrative Zejmen, bashkia Lezhë. Zjarri ka përfshirë një zonë pyjore me pisha dhe bimësi të përzier. Në terren ndodhen katër mjete zjarrfikëse, forcat operacionale dhe banorët e zonës, të cilët punuan për izolimin e vatrës rreth orës 05:45 të mëngjesit. Megjithatë, për shkak të erës, trungjet e djegura riaktivizohen herë pas here, duke kërkuar ndërhyrje të vazhdueshme. Në qarqet e tjera, situata paraqitet më e qetë. Të gjitha vatrat në Berat Gjirokastër, Fier, Elbasan, Durrës, Vlorë dhe Shkodër janë shuar. Në qarkun e Tiranës u raportuan 12 vatra, përfshirë një incident në shtëpinë e fëmijëve "Zyber Hallulli", ku zjarri u neutralizua brenda pak minutave pa pasoja në njerëz, por me dëme materiale. Në total, për shkak të zjarreve janë djegur rreth 32 hektarë me bimësi, lis, arra dhe ullinj, duke shkaktuar dëme të konsiderueshme në mjedis dhe ekonomi. Për përballimin e situatës u angazhuan 85 automjete zjarrfikëse, 557 efektivë të shërbimeve emergjente, një automjet zjarrfikës me pesë efektivë nga Forcat e Armatosura dhe një helikopter për ndërhyrje nga ajri.