Një nga kuvendet e Partisë Demokratike, i thirrur nga ish-kryeministri Berisha është vetëm 5 ditë larg. Ndërkohë që një javë më pas vjen ai i thirrur nga kryetari aktual i kësaj force politike, Lulzim Basha. Si Berisha, po ashtu edhe Basha, pretendojnë se pas Kuvendit të secilit prej tyre, do të dalë një Parti Demokratike më e bashkuar dhe më e fortë. Një retorikë politike. Sepse aktualisht, demokratët janë të ndarë në dy kampe brenda një partie dhe nuk dihet sesi do të jenë zhvillimet politike brenda saj. Gjithsesi, ish-kryeministri Sali Berisha e ka mohuar kategorikisht krijimin e një partie të re, pasi ndihet i sigurt se demokratët do ta shkarkojnë më 11 Dhjetor Lulzim Bashën nga posti i kryetarit të PD-së, duke marrë ai drejtimin e kësaj partie, ashtu sikurse edhe e ka shprehur publikisht. Madje ka shkuar edhe më tej, teksa kërkon të jetë edhe kryeministri i ardhshëm, pas rrëzimit të Edi Ramës. Gjatë foltoreve të tij, Berisha e ka mbajtur retorikën politike në akuzat ndaj Lulzim Bashës, duke filluar nga bashkëpunimi me Ramën, devijimi i PD-së nga idetë konservatore, dosjet Muzin dhe Toyota Yaris dhe shumë të tjera, duke i kërkuar të japë dorëheqjen, akuzat, të cilat nuk i kishte drejtuar kurrë ndaj kryedemokratit para 9 shtatorit.