Digjitalizimi zë një peshë të konsiderueshme buxhetore, pasi deri në vitin 2027 janë parashikuar dhjetë projekte investuese, të cilat kanë për institucion përgjigjegjës Agjencinë Kombëtare të Shoqërisë së Informacionit. Sipas vendimit të këshillit të ministrave, të publikuar në Fletoren Zyrtare, në total deri në vitin 2027 AKSHI-t do t’i alokohen 381 milionë euro. Ky buxhet shkon për projekte në fushën e teknologjisë, të cilat konsiderohen prioritare nga kabineti qeveritar. Projekti më i kushtueshëm i AKSHI-t është ai i digjitalizimit të shërbimeve vendore të qeverisjes lokale dhe sistemi elektronik i prokurimit me inteligjencë artificiale, që ka një vlerë prej 80 milionë eurosh. Socialistët e kanë prezantuar më herët objektivin që në procedurat për dhënien e tenderave të aplikohet inteligjenca artificiale, për të ulur burokracitë, rritur transparencën dhe minimizuar korrupsionin.