Në 30 vjetorin e rrëzimit të shtatores së diktatorit Hoxha në qendër të tiranës kryetari i opozitës Lulzim Basha ka reaguar përmes një postimi në Facebook. Ai e ka konsideruar 20 shkurtin e vitit 1991 si ditën e kremtit të shpresës dhe të ndryshimit që po lindte pas gjysmë shekulli tiranie. “30 vjet më parë, shqiptarët rrëzuan shtatoren e diktatorit më të pashpirt që ka parë historia jonë, në një akt sublim çlirimi nga idhujtaria e diktaturës. 20 shkurti i vitit 1991 ishte kremtim i shpresës së re dhe ndryshimit që po lindte pas gjysmë shekulli tiranie. Ishte klithma e shqiptarëve të lirë në shpirt që kumboi pa pushim në thirrjet “E duam Shqipërinë si gjithë Europa", shkruan Basha. sipas tij simbolet e komunizmit dhe krimeve të atij regjimi janë rikthyer në rrugët dhe sheshet tona, ndërsa thekson se Rama po imiton diktatorin. "Për fat të keq, në Shqipërinë tonë edhe 30 vite pas rrëzimit të bustit të diktatorit, simbolet e komunizmit dhe krimeve të atij regjimi janë rikthyer në rrugët dhe sheshet tona, për të trembur përpjekjen tonë tridekadëshe për ta bërë Shqipërinë si gjithë Europa. Jo vetëm nostalgjikët e viteve të mbrapshta e të zymta të diktaturës, por edhe të tjerë që për të mbajtur me çdo kusht pushtetin imitojnë diktatorin, janë sot kërcënimi më i madh për demokracinë dhe lirinë tonë”, thotë më tej Basha. Kreu demokrat tha se ky vërshim ogurzi do të ndalet për të kthyer vendin në rrugën europiane. “20 shkurti është festa jonë e çlirimit shpirtëror nga damka e turpshme e diktaturës! Le të jetë edhe dita e besëlidhjes për të mos e lejuar kurrë më rikthimin e hijeve të saj mes nesh!", mbyll mesazhin lideri i PD.