Tre gjyqtarë, që kanë qenë për shumë kohë në radhët e Drejtësisë në Shqipëri dhe në funksione mjaft të rëndësishme kanë pësuar një tjetër goditje pas shkarkimit nga vettingu. Fatos Lulo, Bashkim Dedja dhe Shkëlzen Selimi janë tre ish-gjyqtarët për të cilët është marrë vendimi për sekuestrimin e pasurive të tyre. Ata janë hetuar nga prokuroria e Posaçme Kundër Korrupsionit dhe Krimit të Organizuar për veprën penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim” tashmë nuk do të kenë mundësi të përdorin asetet e tyre, pas vendimit për sekuestrim. Nga hetimi penal i kryer ndaj Fatos Lulo ish-gjyqtar në Gjykatën Kushtetuese, Bashkim Dedja ish-Kryetar në Gjykatën Kushtetuese dhe Shkëlzen Selimi ish-gjyqtar në Gjykatën e Lartë rezultuan të dhëna që këta subjekte kishin në pronësi pasuri të paluajtshme, të cilat nuk i justifikonin me burime të ligjshme, apo pasuri që i kanë fshehur.