Ekzekutimi në mes të Tiranës i shtetasit Behar Sofia i ka futur në dyshime të mëdha ekspertët e grupit hetimor. Pas marrjes në pyetje të familjarëve, një tjetër dëshmi mjaft e rëndësishme është edhe ajo e shoferit të viktimës, që në fakt punonte për të si part time dhe jo si një i punësuar rregullisht. Dëshmitari me inicialet S.K u tha thënë hetuesve të vrasjes se "gjatë kohës qe ishte me Behar Sofinë ai i ka shprehur shqetësim për një debat përmes telefonit me një sipërmarrës, të cilin me emër nuk e njeh”. Sipas dëshmitarit, konflikti mes viktimës dhe një tjetër sipërmarrësi ka qenë për vonesa të pagesave për një dyqan që ndodhet tek unaza e re në zonën e Astirit. Por, jo vetëm kaq. Si dëshmitar dhe madje i shoqëruar për këtë ngjarje ka qenë edhe shtetasi M.Elezi, që pas marrjes në pyetje është lënë i lirë. Burimet thonë se për këtë person ka pasur dyshime të forta, duke shtuar se po mbahet edhe nën vëzhgim. Ai kishte karakteristikat e një të dyshuari por ky version ra poshtë.