Qeveria synon të zgjidhë problemin e trafikut të rënduar rrugor në qytetin e Sarandës përgjatë sezonit turistik me ndërtimin e një ByPass që lidh rrugën nacionale Gjirokastër-Sarandë me aksin Kardhiq-Delvinë. Për këtë qëllim, Autoriteti Rrugor Shqiptar ka hapur këtë të mërkurë tenderin për fazën e parë të këtij ByPass-i. Tenderi me vlerë 24 milionë euro bashkë me TVSH-në parashikon ndërtimin e një rruge te kategorisë C2 në një gjurmë krejtësisht të re. Rruga ka një gjatësi prej gati 3.3 kilometra dhe në relacionin shoqërues të projektit thuhet se varianti i prezantuar mund të ketë nevojë për përmirësim, por në fazën aktuale është vlerësuar si gjurma më e mirë e mundshme. Aksi fillon me një rrethrrotullim që lidhet me rrugën nacionale Gjirokastër-Sarandë dhe Bypassin e Sarandës, shtrihet në një terren kodrinor deri afër lumit të Bistrices, ku parashikohet ndërtimi i një ure rreth 70 metra të gjatë dhe më pas vazhdon në terren fushor për t’u lidhur me rrugën Kardhiq-Delvinë.