Një sasi e konsiderueshme, prej 15 kilogramë lëndë e dyshuar heroinë është sekuestruar në pikën kufitare të Kakavijës, pas kontrollit të ushtruar në vijën e dytë ndaj një automjeti tip kamion. Operacioni policor i koduar “Koordinimi”, për goditjen e veprimtarisë kriminale në fushën e trafikimit të lëndëve narkotike ishte rezultat i bashkëpunimit mes Policisë Kufitare të Kakavijës, FRONTEX-it, Sektorit të Narkotikëve në DVP Gjirokastër dhe shërbimeve doganore. Policia ka bërë të ditur se pas skanimit dhe kontrollit në vijën e dytë u bë e mundur gjetja e lëndës narkotike që ishte fshehur në kroskotin e kamionit. Shoferi i arrestuar është Shpëtim Pjeshka, banues në Elbasan dhe akuzohet për veprën penale “Trafikimi i narkotikëve”. “Gjatë kontrollit të detajuar nga shërbimet e Policisë Kufitare dhe ato të Sektorit për Hetimin e Narkotikëve në DVP Gjirokastër u gjetën dhe sekuestruan në cilësinë e provës materiale 30 pako të mbushura me lëndë narkotike të dyshuar heroinë, me peshë totale 15 kilogramë. Nga specialistët për Hetimin e Narkotikëve në DVP Gjirokastër, në bashkëpunim me Prokurorinë, vijon puna për identifikimin dhe kapjen e personave të tjerë të përfshirë në këtë veprimtari kriminale”, thuhet në njoftimin e policisë. Ky është një tjetër rast kur sekuestorhte sasi e konsiderueshme lëndësh narkotike të forta. Vetëm në Portin e Durrësit janë sekuestuar gjatë prillit, në një rast 143 kg kokainë në një kontenier bananesh që vinte nga Ekuadori e ku u vunë në pranga dy administratorët e kompanisë Klajdi Xiraku dhe Erjon Peti. Në rastin e dytë është ndaluar 49 kg kokainë po në një kontenier bananesh që vinte nga Ekuadori për komaoninë ë babait të Arber Çekaj, i arrestuar vite më parë po për trafik ndërkombëtar narkotikësh.