Rreth 120,000 turistë janë të bllokuar në hotelet e tyre ndërsa uragani Grace po shkakton kaos në resortet meksikane. Pushuesit janë të bllokuar në hotele ndërsa stuhia e shoqëruar me erëra të fuqishme ëhstë përplasur mbi destinacionin e njohur turistik pasi më herët rrafshoi brigjet e Karaibeve. Uragani i kategorisë 1 goditi gadishullin Yucatan, ku ndodhen Cancuni, Playa del Carmen dhe ishulli Cozumel, mëngjesin e të enjtes. Ai preku tokë në jug të Tulumit, pasdite me erëra që kapnin shpejtësinë e 136 km në orë. Të paktën 180 mijë njerëz kanë mbetur pa energji elektrike ndërsa kushtet e motit ekstrem vazhdojnë të shkaktojnë kaos. Videot tregonin qiejt e errësuara mbi plazhet e zbrazura në prag të mbërritjes së uraganit Grace. Ky i fundit do të bëjë përpara drejt gjirit të Meksikos në jugperëndim të premten pasi të përshkojë gadishullin Yucatan. Autoritetet janë tani në alarm dhe kanë nisur të hapin streha për të mbajtur të sigurt banorët lokalë në rast rreziku përmbytjesh.