Policia ndërmori sërish një operacion të koduar Perimetri për të ndaluar trafikantët e klandestinëve, veprim që e kryenin kundrejt shpërblimit. Kësisoj janë arrestuar në flagrancë 3 shtetas dhe shpallur në kërkim 1 tjetër, të cilët po transportonin 27 emigrantë të paligjshëm dhe nuk iu bindën urdhrit të punonjësve të Policisë për të ndaluar. Shërbimet e Komisariatit të Policisë së Devollit në bashkëpunim me strukturat për Hetimin e Krimeve dhe Forcat Operacionale "Shqiponjat" në vijim të operacionit të koduar "Perimetri", kanë goditur një tjetër rast të aktivitetit kriminal të dhënies së ndihmës shtetasve të huaj, për kalim të paligjshëm të kufirit, kundrejt fitimit. Policia ndërhyri pas informacioneve të siguruara në rrugë policore se me një mjet tip furgon "Volksëagen Crafter", disa shtetas po transportonin në drejtim të Tiranës emigrantë të paligjshëm, kanë organizuar shërbimet dhe kanë bërë të mundur lokalizimin e mjetit pranë fshatit Poloskë, Devoll. Gjatë ndjekjes, drejtuesit të këtij mjeti i është bërë me shenjë të ndalonte, por ai nuk i është bindur urdhrit të punonjësve të Policisë dhe ka braktisur mjetin, brenda të cilit u gjetën 27 emigrantë të paligjshëm, të cilëve kundrejt shpërblimit prej 1000 euro secilit, iu ishte premtuar kalimi për në vendet e BE-së. Nga veprimet hetimore të kryera rezulton se dy shtetasit me inicialet M. Gj. dhe K. P, (të arrestuar) ishin në rolin e organizatorëve të kësaj veprimtarie kriminale.