Një automjet i dyshimtë tip Opel, u ndalua nga policia e Lezhës për kontroll, ku u konstatuan 10 thasë me lëndë të dyshuar kanabis, me peshë totale 36 kilogramë. Në kuadër të operacionit policor "Zmeja" policia arrestoi në flagrancë shtetasit R. L. dhe K. Z. , si të dyshuar për prodhim dhe shitje të lëndëve narkotike. Në vijim të operacionit, policia ushtroi edhe një kontroll të thelluar në banesën e këtye dy shtetasve, ku në shtëpinë e Roland Lalës u gjetën dhe u sekuestruan në cilësinë e provës materiale 1 armë zjarri kallashnikov, një pistoletë shenjëdhënëse dhe municion luftarak. Materialet procedurale i kaluan Prokurorisë së Rrethit Gjyqësor Lezhë, për veprat penale ”Prodhimi dhe shitja e narkotikëve”, kryer në bashkëpunim dhe "Armëmbajtja pa leje". Vijon puna nga ana e autoriteteve për identifikimin dhe kapjen e personave të tjerë të përfshirë në këtë veprimtari kriminale.