Zv. Presidentja e SHBA, Kamala Harris priti mëngjesin e sotëm kancelaren gjermane Angela Merkel në rezidencën e saj në Uashington. Më vonë Merkel do të takohej me Presidentin Biden në Shtëpinë e Bardhë. Takimi shënonte herën e parë që Harris pret një lider të huaj që prej ardhjes në zyrë. Kur Merkel mbërriti, Harris ia bëri të ditur këtë kancelares duke i thënë se ishte hera e parë që pritej një zyrtar i tillë në rezidencën e zv. presidentit. “Jemi të lumtur t’ju mirëpresim zonja kancelare, duke e ditur se jeni në administratën e katërt që punoni, gjatë karrierës suaj të jashtëzakonshme,” tha Harris në përshëndetjen e saj për Merkel. “Jam e nderuar t’ju takoj pasi kuptohet që marrëdhënia mes dy vendeve tona është e bazuar në shumë vlera të përbashkëta. Mirëseerdhët”, uroi zv. presidentja.