Situata e zjarreve po shkon drejt normalizimit, pas emergjencës së ditëve të fundit që përfshiu disa zona të vendit. Nga 35 vatra të raportuara gjatë 24 orëve, vetëm pesë mbeten aktive, ndërsa tri të tjera po mbahen nën kontroll. Aktualisht nuk raportohet rrezik për zonat e banuara. Në operacione janë angazhuar 382 forca dhe 40 automjete zjarrfikëse. Forcat e Armatosura kanë ndërhyrë me 90 efektivë dhe tre helikopterë. Në Dajt, zjarri po shkon drejt shuarjes, ndërsa vatra e Priskës është vënë nën kontroll. Me intensitet të ulët vijon zjarri në Lufaj të Mirditës. Situata është përmirësuar edhe në Tërbun të Pukës, ndërsa vatrat në Gjegjan dhe Gojan mbeten aktive. Gjatë operacionit u evakuua një familje dhe u shmang rreziku për banesën e saj. Në zonë po ndërhyjnë 40 efektivë dhe dy helikopterë. Forcat zjarrfikëse vijojnë punën edhe në Gjorm të Sipërm, Tunjë të Re dhe Qafë Helmes. Zjarri në Gurë-Lurë është shuar dhe zona mbahet nën kontroll. Autoritetet bëjnë të ditur se kapacitetet operacionale mbeten në terren dhe në gatishmëri për çdo riaktivizim të mundshëm të vatrave.