“Greva e urisë mbaron sot” – ka deklaruar me emocion Pano Ruci, ndërsa turma shpërtheu në duartrokitje duke brohoritur: “Drejtësi! Drejtësi!”. Pas 23 ditësh grevë urie, babai shqiptar i Denis Rucit, i cili humbi jetën në tragjedinë e Tembit ku përplasja e dy trenave shkaktoi vdekjen e 57 persnave , njoftoi përfundimin e protestës së tij pasi u pranuan të gjitha kërkesat. Në vendimin e marrë nga prokuroria e Larissës, i hapet rruga zhvarrosjes të trupit të Denis Rucit dhe kryerjes së analizave toksikologjike dhe gjenetike në prani të ekspertëve të pavarur të caktuar nga familja. Në sheshin Syntagma të Athinës, përballë dhjetëra qytetarëve që e mbështetën çdo ditë, Ruci falënderoi publikisht mjekët, mbështetësit dhe të gjithë ata që qëndruan pranë tij: “Është një luftë e përbashkët, dhe do ta vazhdojmë deri në fund,” tha ai i përlotur, duke ftuar qytetarët në një tubim të ri nesër në orën 18:30 në Syntagma, “për të festuar së bashku këtë fitore.” Ndërkohë, rikthehen për hetim kallëzimet dhe dosjet e arkivuara të Tembit, që lidhen me përgjegjësi të mundshme të mjekëve ligjorë dhe ekspertëve. Burime gjyqësore sqarojnë se fillimi I analizave toksikologjike dhe gjenetike nuk nënkupton rifillim të hetimit kryesor për tragjedinë.Do të krijohet një dosje e re, bazuar tek rezultatet që do t’i dorëzohen gjykatës sapo të nisë gjyqi. Data e nisjes së gjyqit për tragjedinë e Tembit pritet të shpallet brenda pak ditësh dhe parashikohet për shkurt ose mars të vitit 2026.