Rruga e Volodimir Zelenskit për në shtetet e bashkuara të Amerikës ka kaluar nga Kanadaja. E diela ka rezervuar një tjetër takim me qëllim arritjen e armëpushimit mes Ukrainës dhe Rusisë. Këtë herë Presidenti ukrainas do të takojë në Florida presidentin amerikan, Donald Trump që do ta presë në rezidencën e tij në Maralago. Por para se të jetë përballë presidentit amerikan, ai ka marrë mbështetje nga Mark Carney, kryeminsitri kanadez që foli për "kushte të një paqeje të drejtë dhe të qëndrueshme”. Carney vuri në pikëpyetje gatishmërinë e Rusisë kur kujtoi sulmin masiv të ushtrisë së saj mbi civilët ukrainas. Mes akuzave për Moskën që nuk do paqe, Zelensky tha se në Florida shkonte për të reduktuar në minimum çështjet e pazgjidhura. "Sigurisht, sot ka vija të kuqe për Ukrainën dhe popullin ukrainas. Ka propozime kompromisi. Të gjitha këto çështje janë shumë të ndjeshme", deklaroi zelensky. Ukraina po punon me SHBA-në për planin e rindërtimit të vendit, fatura për të cilin shkon mes 700 dhe 800 miliardë dollarëve, sic e përmendi presidenti ukrainas Ai foli edhe për mundësinë e krijimit të një zone të çmilitarizuar në rajonet lindore të vendit dhe sipas planit të propozuar Centrali Bërthamor i Zaporizhias, mund të bashkëmenaxhohet nga SHBA, Ukraina dhe Rusia. Në takimin me Zelenskin, Mark Carney njoftoi një ndihmë shtesë ekonomike prej 2.5 miliardë dollarësh për Ukrainën që ta ndihmojë për të zhbllokuar burimet e Fondit Monetar Ndërkombëtar.