Presidenti ukrainas Volodymyr Zelensky hodhi poshtë propozimet për një zonë neutrale midis forcave ukrainase dhe ruse si pjesë e një marrëveshjeje paqeje, duke argumentuar se kjo nuk pasqyron realitetin e luftës moderne. Komentet e tij erdhën pas lajmeve që sugjeronin se udhëheqësit evropianë po shqyrtonin një zonë neutrale prej 40 km si pjesë të një armëpushimi ose një marrëveshjeje afatgjatë. Lufta në Ukrainë ka evoluar në një konflikt të dominuar nga teknologjia e dronëve dhe Zelensky tha se një lloj zone e tillë ekzistonte tashmë për shkak të kërcënimit të sulmeve me dronë pranë vijës së frontit. "Tashmë armët tona të rënda ndodhen në një distancë prej më shumë se 10 km nga njëra-tjetra, sepse gjithçka goditet nga dronët", tha ai. "Kjo zonë neutrale - unë e quaj 'zonë e vdekur', disa e quajnë 'zonë gri' - tashmë ekziston", tha Zelenski. Çdo marrëveshje e tillë mund të nënkuptojë gjithashtu që Ukraina të heqë dorë nga një territor brenda zonës, të cilën Zelensky gjithashtu e hodhi poshtë: "Nëse Rusia dëshiron të ketë një distancë më të madhe nga ne, ata mund të tërhiqen në territoret e pushtuara përkohësisht të Ukrainës." Ndryshe nga propozimet e diplomatëve europiane të njoftura në mediat për një armëpushim apo marrëveshje, kancelari gjerman, Merz, theksoi nga Franca se lufta në Ukrainë mund të zgjasë për muaj të tërë. Gjatë takimit me presidentin francez Macron, ai u shpreh se Putin ka vënë kushte të papranueshme. Merz përsëriti edhe se Ukraina nuk do të braktiset.